Аляксандар Лукашэнка падпісаў указ, які прадугледжвае дадатковыя захады па забесьпячэньні Ўзброеных сіл, іншых войскаў і вайсковых фарміраваньняў транспартнымі сродкамі і бесьпілётнікамі іншых дзяржаўных органаў і арганізацый у пэрыяд мабілізацыі і ваеннага часу.
Як адзначаецца на сайце Лукашэнкі, цяпер вайскова-транспартны абавязак распаўсюджваецца на транспартныя сродкі дзяржаўных органаў і іншых арганізацый, а таксама на грамадзян, якія атрымалі аўтамабілі на падставе дагавору фінансавай арэнды (лізінгу).
Апроч таго, у дакумэнце ўдакладнілі парадак вызначэньня мабілізацыйных заданьняў для арганізацый-пастаўшчыкоў транспартных сродкаў і іх уліку пры мабілізацыйным разгортваньні.
Міністэрства абароны будзе мець паўнамоцтвы па вызначэньні пералікаў запасных частак, інструмэнту і інвэнтару, неабходных для забесьпячэньня работы перададзеных транспартных сродкаў.
Урад павінен распрацаваць і зацьвердзіць парадак кантролю за выкананьнем вайскова-транспартнага абавязку.
ГЛЯДЗІЦЕ ТАКСАМА: У Беларусі вызначылі, як будуць працаваць лякарні пры масавым паступленьні траўмаваных