Тады Ціханоўскі сказаў, што беларусы, якія пакінулі радзіму, маглі б ствараць «астравы» з аўтаноміяй.
«Заўсёды ёсьць розныя людзі, розныя меркаваньні, — цытуе Наўседу Delfi. — Нарэшце, давайце ўлічваць той факт, што чалавек у жудасных умовах апошнія некалькі гадоў знаходзіўся ў турме. Магчыма, у яго крыху іншае ўяўленьне аб працэсах, якія на самой справе адбываюцца, калі ён шмат гадоў правёў у цёмнай турме».
«Давайце зразумеем яго сытуацыю, пастараемся ацаніць цьвяроза», — дадаў Наўседа.
Сам Сяргей Ціханоўскі сказаў, што яго няправільна зразумелі.
«Ніхто і ніколі ня будзе ствараць ніякіх аўтаномных акруг і астраўкоў у Літве. Беларусы бязьмерна ўдзячныя Літве за гасьціннасьць, мы паважаем сувэрэнітэт і тэрытарыяльную цэласнасьць Літвы, — цытуе Ціханоўскага «Наша Ніва». — Я заклікаю беларусаў працягваць барацьбу з рэжымам Лукашэнкі. Не забываць сваю мову і культуру, мець зносіны паміж сабой, дапамагаць адно аднаму. Наша задача — вярнуць сваю краіну, а пакуль мы ў выгнаньні — ня страціць паміж сабой сувязь.
Зразумейце, я прадпрымальнік. І я хацеў прапанаваць беларусам у ЭЗ стварыць бізнэс-хабы, для беларускіх прадпрымальнікаў, каб яны і іх семʼі размаўлялі паміж сабой. Бо шмат таленавітых і кваліфікаваных спэцыялістаў пераехалі сюды праз рэпрэсіі. Я і да 2020-га дапамагаў людзям, і цяпер —— хачу ім дапамагчы. Менавіта гэта я меў на ўвазе і пра гэта казаў больш падрабязна ў сваіх папярэдніх інтэрвію».
Дарадца Сьвятланы Ціханоўскай у дыпляматычных пытаньнях Дзяніс Кучынскі ў заяве, апублікаванай у аўторак, якую цытуе LRT, адзначыў, што «мы ніколі ня ставілі пад пытаньне і ня будзем ставіць пад пытаньне сувэрэнітэт і тэрытарыяльную цэласнасьць Літвы».
Форум